Haraldur V. Sveinbjörnsson

Haraldur V. Sveinbjörnsson (f. 1975) nam píanóleik hjá Árna Harðarsyni við Tónlistarskóla Kópavogs og útskrifaðist þaðan árið 1997. Hann lauk BA-gráðu í tónsmíðum frá Tónlistarskólanum í Reykjavík undir handleiðslu Hilmars Þórðarsonar árið 2001 og meistaragráðu (MMus) í tónsmíðum frá Lund University / Malmö Musikhögskola þar sem kennarar hans voru Kent Olofsson og Luca Francesconi. Haraldur lagði einnig stund á upptökutækni og raftónlist á ýmsum námskeiðum á Íslandi og í Svíþjóð.

Hljómsveitarverk hans Sjö byltur svefnleysingjans hlaut Morgondagens tonsättare-verðlaunin („Tónskáld morgundagsins“) í Helsingborg í Svíþjóð árið 2003. Ári síðar frumflutti Helsingborg Symphony Orchestra tvö verk eftir Harald: Seven Songs of the Insomniac í febrúar og Hraun í maí. Sjö byltur svefnleysingjans var einnig tilnefnt sem besta samtímaverkið á Íslensku tónlistarverðlaunin árið 2005.

Meðal annarra þekktra verka hans eru Memento Mei (2005) fyrir blandaðan kór, Piece & Harmony (2001) fyrir strengjasveit, Duel (2003) fyrir kontrabassa og rafhljóð, Dawn (2007) fyrir slagverkstvíeyki, Hodie (2009) fyrir kvennakór, Forget-me-not (2016) fyrir flautu, fiðlu og píanó, Painting (2016) fyrir hörpu og slagverk og Dots, commas, lines (2019) fyrir blástursoktett.

Verk Haraldar hafa verið flutt víða um Evrópu, auk Bandaríkjanna og Ástralíu.

Samhliða klassískum tónsmíðum hefur Haraldur leikið með ýmsum rokk- og popphljómsveitum, þar á meðal Dead Sea Apple, Red Barnett og Menn Ársins. Meðal vinsælla laga eru Sick of Excuses (Dead Sea Apple 1996), A Yeah Yeah Love Song (Dead Sea Apple 1997), Dear God (Dead Sea Apple 2003), Bearer of Bad News (Dead Sea Apple 2006), Þakklæti (Buff 2008), 12 Steps to the Liquor Store (Menn Ársins 2008), Gefst ekki upp (undankeppni Eurovision – Menn Ársins 2010) og Life Support (Red Barnett 2015).

Árið 2010 sá Haraldur um útsetningar og upptökustjórn á jólaplötu Regínu Óskar, Regína Ósk um gleðileg jól.

Haraldur hefur einnig gert hljómsveitarútsetningar fyrir fjölda uppseldra tónleika á Íslandi, þar á meðal uppfærslu á plötu Pink Floyd, The Wall með Dúndurfréttum og Sinfóníuhljómsveit Íslands, Lennon-heiðurstónleika árið 2006, Sgt. Pepper’s Orchestral Tribute árið 2008, Páll Óskar og Sinfóníuhljómsveit Íslands árið 2011, auk verðlaunaðra tónleika Skálmaldar og Sinfóníuhljómsveitar Íslands árin 2013 og 2018.