Arngunnur Árnadóttir
f. 1987
Arngunnur Árnadóttir er tónlistarkona og rithöfundur. Hún stundaði framhaldsnám í klarínettuleik hjá Einari Jóhannessyni við Listaháskóla Íslands og Ralf Forster og Wenzel Fuchs við Hochschule für Musik Hanns Eisler í Berlín. Hún hefur frá haustinu 2012 gegnt stöðu fyrsta klarínettuleikara Sinfóníuhljómsveitar Íslands.
Arngunnur leggur stund á ýmiss konar tónlistarflutning. Hún hefur flutt kammertónlist meðal annars við opnun tónlistarhússins Hörpu og á tónlistarhátíðinni Reykjavík Midsummer Music og hefur komið fram með tónlistarmönnum á borð við Skúla Sverrisson og Víking Ólafsson. Arngunnur hefur einnig vakið athygli sem einleikari með hljómsveit ásamt stjórnendum á borð við Daníel Bjarnason og Cornelius Meister.
Sem rithöfundur hefur Arngunnur sent frá sér tvær ljóðabækur og eina skáldsögu. Nýjasta bók hennar, Ský til að gleyma, kom út haustið 2018.